تقييمي للبرايم

مساء الخير اصدقائي. وكل عام وانتم بالف
وربي يجعل ال2016 عام حب وامان وسلام للوطن العربي. وشخصيا تحققوا كل احلامكم وامنياتكم.

تقييمي للبرايم بشكل عام كان برايم رااائع لاول مره فشولي خلقي. ريبورتاجات عدد قليل بالمقابل اغاني اكتر.

البدايه مع فارس كرم مع مروان.. مروان ابدع بالغناء وهاد لنه كوني بغني شيء جبلي بس عنده مشكله ما بقدر يصيب العالي دايما.
صعب تحدد وين الخلل اذا بدي انتقد مرون بسبب وجود فارس كرم يلي ولع المسرح مع يلي بدق عالدف.

دينا مع اغنية هوا هوا لسميره سعيد. صوت دينا ع العالي حلو وفرقت كتير. بين صوتها وبيلمع. بتمنى تستمر هيك دينا بهالراحه ع المسرح والكاريزما اللي عندها ياها. والاهم من هيك التقدم يلي عندها.

نسيم بجنن مع بوسي. لون جديد شفنا فيه نسيم لاول مره بقدمه لدرجة كنت بفكر انه بغني بلاي باك قد ما كان حلو. بس ما حبيت الراب يلي عملو. الراب هو كمان فن مش بس صف حكي ورا بعض. وغنى الراب وهو مستحي. مع انه مش رابر. لكن شخصية نسيم بتخليك تتوقع منه كل شي.

النوميميز...
بالتوفيق لايهاب. انا بنسحب اغنيه بدها احساس وهاد يلي عملو ايهاب. ولو انه ما كان يصيب الواطي منيح. لكن عالعالي كان افضل واجمل ومريح للسمع... وبخروج ايهاب خسرنا شخص بالفعل لازم يكون احد المنافسين للقب لانو بيستحق يبقى للفاينال... على الرغم من مشكلةالراء عنده. الا انه ايهاب هالقد معه وهالقد بقدر وشو ما غنى برافو...

دينا ما سمعت اغنيتها التانيه.

هايدي واغنية كيفك انت. يمكن لانها مصريه ما قدرت تقريبا تقول اللكنه صح. اوقات كانت تسبق الموسيقى او تتاخر عنها. يمكن من هيصة الجمهور... اغنيه رائعه وبدها احساس. بس انتقادي لهايدي انها لما بتاخد اغنيه متل هيك بتعطي تنهيده بالاغنيه.والتنهيد مش احساس. الاحساس انك تغني الاغنيه وكأنك بتوصفيلنا معناها بصوتك.. .. ما رح قول الا انه على الرغم من هيك الا انها كانت متألقه.

انا شخصيا اغنيه للعمالقه متل فيروز ما بحب حدا يغنيلهم. لانه اصحاب الاغنيه بكونوا هني اصحاب الاغنيه وما حدا بقدر يعطي هالاحساس متلهم.... متل فيروز او عبد الحليم.

عباس.... غنى لعبد الحليم .. ولو اني بفضل من الاداره مره تانيه تترك فيروز وعبد الحليم ع جنب..... عباس بالبدايه ما اعطى الاغنيه حقها خاصه بكلمة اهوواااك... نشز شيء بسيط فيها وببداية الاغنيه بالكوبليه الاول ما كان المغنى زابط معه... بالكوبليه التاني اعطانا الاحساس وفرجانا قديش الاغنيه بتستحق نسمعها منه للاخر.. بس هاد ما بكفي الي انا شخصيا كمشاهد. بدي اسمع الاغنيه واستمتع فيها من اولها لاخرها. مش من نصها لاخرها...

رفاييل..... وكانه المايك خربان معه. يا بطلع صوته يا ما بطلع.. بس عنده ياها شعطة الشيطنه يلي عنده ياها فارس كرم.... ما رح قول شي عن اداء رفاييل. بس رح قول الله يرحم ايام دقدوق . ناصيف . محمد رمضان. زكي . ... واكيد فهمتوا شو قصدي.

نسيم وحنان......
نسيم صووت جميل واحساس بوصل للكل... حنان اول مره بستمتع بصوتها والعاالي حلوووووو عليها بين صوتها. مع انه عندي نقد واحد عليها.. صح حنان حلوه كتير. بس ما بعرف مين قال انه البنت الحلوه لازم تتدلع. الدلع مش حلو بالغناء.. ما بحكي عن الدلع بالحركات... الدلع بالمغنى.... كنت اتمنى ما تكون تدلعت بالغناء..... نسيم صوت راااائع وحلو وما حدا بختلف عليه. لكن صار لااازم ينضج صوته. مخارج الحروف عنده تنضج. الصوت الحلو ما بكفي اذا بعض مخارج الحروف بتطلع من ولد صغير.

مروان ابدا ما عجبني باغنية قلبي وشو بدي قله. وعالعالي ابدا ما زابطه معه. العالي بدو نفس قوي وخبره.. وهاد يلي بتعطيهم اياها ليسلي..... ما نشز ولا طلع عن الطبقه. بس العالي ما بلبقله.

بالنسبة الي النوميني من بعد البرايم:
عباس أو حنان ورفاييل.
مروان ورفاييل

.....
بالمناسبه اذا شفتو ريبورتاج عمله صورهم على شجرة الميلاد. كانوا يحطوها قبل البريك... اول صورة فوق رأس الهرم حاطين صورة مروان.. قلت هلا بالمنتدي بيجي حدا ويقول شايفين كيف حاطين مروان فوق اول واحد معناها اللقب لمروان ههههههههه

تصبحوا على الف خير اصدقائي