تقييمي الشخصي للبرايم

مساء الخير
وبالاول ببدأ بالتحيه والتهنئه لاخواننا المسيحيين بعيد الميلاد وبتمنى تدوم المحبه والسعاده والألفه...
وكل عام والجميع بالف خير بمناسبة المولد النبوي الشريف
وبالفعل اعجبتني كلمة كلوديا اللي بدأت فيها البرايم. بانه تزامن الميلادين ما كان صدفه
ونحن كعرب اصداقي بحقلنا نعيش بفرح وسعاده وكلنا اخوه مسلمين ومسيحيين نبني بلدنا ونحميه وندافع عنه...
يا رب احمي بلادنا وشعبنا العربي من المحيط للخليج.
اللهم امين

تقييمي الشخصي للبرايم.

- البدايه كانت صاعقه الي. تعودت اسمع نشيد الاكاديميه يلي بلشت احبو (يا ريت يلي حافظ الكلام يكتبه في بعض الكلمات ما فهمتها منيح ههههههه) ... صاعقه انه شيء غير عن المألوف بدأ البرايم، التابلو حلوووووو لكن الاصوات ما كانت حلوه خاصه وانهم غنوها بلي باك مع لايف... يعني البلي باك كان شغال مع صوت الطلاب كان لايق. هالشيء عمل خروج عن ريتم الاغنيه ما غنوا بذات السرعه .. وحسيت لوهله اني بحضر فرقة جوقة طلاب روضه وتمهيدي... ويلي حلا الافتتاحيه كانوا الراقصين والديكور ووجود للطلاب كتماثيل.
المهم اهلين بنانسي عجرم واغنيتها الجديده الي بتااااخد العقل ويلي كان من المفروض تغنيها باخر البرايم مش بالاول....

- هايدي واخيرا رجعت تغني الطرب. واعجبني التابلو مع انه ما كان فيه فكره من ناحية انسجام التابلو مع الاغنيه. وهايدي من اجمل الاصوات يلي مرت بتاريخ البرنامج متلها متل ناصيف نسمه ساره سعد رمضان ....الخ

- رفاييل ما غنى حلو، الارتباك واضح عليه ومش معروف شو سبب الارتباك هل هو النومينيشن او كتر ما هتف الجمهور باسمه.
جني يا عيوني غناها بالبرفات بالاكاديمي بطريقة رااااائعه جدا وتوقعت رح يكسر المسرح.. الا انه خذلني بعكس توقعاتي. عموما مبروك لفانز رافي بيستاهل يبقى اكتر من انيس لانه حضوره قوي وعامل جو بالبرايمات باستثناء هذا البرايم.... علما في ناس طلعوا بستحقوا يبقوا مكانه.

- انيس الله يوفقه وزعلت عليه. شب مؤدب خلوق وفنااااان. بس غناؤه بالبدايه ما كانت ماشيه معه بسبب الجمهور لكن بعد شوي غنى ع الايقاع وطبقة صوته مريحه. وهالنوع من الاغاني هو اللي بيلبق لأنيس اكتر من الاغاني الdance .

- عباس غنى حلو بس الاغنيه مش لابقه عليه. بلبقله اكتر متل اغنية 3 كلمات.

- نانسي طلت مره جديده وهالمره مع دينا. حسيت نانسي بتغني تحت تهديد السلاح وكأنه ما بدهاااا تغني، حسيت رح ترمي الميكرو ع الارض وتترك المسرح. بس هي اختصرت وما حبت تعمل مشكله... قصدي مجبورة تغني.. وكأنها الاغاني المصريه اللي تتغنى بالبرايم شرط اساسي تكون من كلمات امير طعيمه.. كل ضيف غنى مصري اجي ع البرنامج لازم تكون وحده من اغانيه شغل امير.. مع انه في اغاني بالبوم نانسي بتستاهل تتغنى اكتر من ما تيجي هنا. متل وبكون جايي ودعك... دينا غنت حلو مع نانسي. غنت على قد الاغنيه ومتل ما هيي وبدون عرب... نانسي قضتها من نص الاغنيه تقول انا ان انا ان.. بفتكر دينا بسبب هالبرايم ما رح تكون نوميني هالاسبوع.

- نسيم.. حبيب القلب . يلي هوي بنظري الفائز باللقب. سواء اخدو او لا هوي بنظري الستار . ومين ما فاز الف مبروك اله وبفرحله بكفي انه بنظري نسيم الستار... بدأ الاغنيه بعرب زياااااااده مع انها مش بحاجه الاغنيه ببدايتها لعربه. اغانيه رومانس بدها مشاعر اكتر من عرب.. ضليت حاط ايدي ع قلبي وزعللللللللت من غناؤه للاغنيه، البعض منكم حب طريقة اداءه. بس انا ماااا حبت. حبيت بس لما طلع ع العالي هون ابدع. ومع هيك ايدي ع قلبي ما يطلع نوميني.

- ايهاب البحار وتابلو رائع جدا. بس الاغنيه كمان مش لابقه عليه . يمكن لاني تعودت اسمعها من الهام المدفعي ولكن ايهاب او (اهاب) لازم ينتبه ينتبه ع مخارج الحروف.... ما بحكي عن الراء.. عنده حروف بتطلع ناعمه وانت بوقت بتغني شيء باعتباره فلكلوري. بده شوية رجوله.... كيف بالطبخ بقولوا رشة ملح.. ايهاب بده رشة رجوله تضخيم للحروف شوي... غنى حلووووو وبتمناله التوفيق. وشو ما غنى بلبقله وبتوقع يكون ضمن الفايناليست.

- التوب 3 جلطني... مش رح علق عليه.

- مروان غنى حلو وطريقة حلوه وشكل سلس. لكن هالشخص مرات بحسه مغرور مرات بحس قلبه طيب.... ما رح علق ع شخصيته بس كغناء كان رائع واطربني. خاصه انها هالاغنيه هي من اغنياتي المفضله.

- حنان يلي غنت باخر البرايم مع نانسي عجرم. ويلي كنت ناسي امرها. راح عن بالي انه في حنان بالبرنامج وما غنت. طلت مع اغنية مقسومه نصين ومع انه كمان مره بقولهاااا في اغاني هيت اكتر لنانسي بالبومها الاخير كان فيهم يختاروا اغاني تانيه. حنان كانت لايت... يعني متل الشوكولا في منها عادي وفي شوكولا لايت.. في علبة سجاير احمر وغي علبة سجاير لايت لونها ابيض.. حضورها وغنائها كان لايت.

هذا كل ما لدينا اليوم
تقبلوا مروري اخوتي الكرام