موضوع خطير

من طرف **Admin** الجمعة ديسمبر 16, 2016 2:07 pm

السلام عليكم

كيف الجميع ان شاء الله بخير ، انا الحمدلله تمام لمن يهمه الامر

مع اني بعرف ان بعد هذا الموضوع احتمال كبيير تـ نوقف عضويتي مع اني ما رح قول اي كلمة مخالفة ولا اي تلميح مخالف ، رح احكي بوضوح .

هـالمنتدى من أنجح المنتديات العربية وأنا شخصيا من زمان بدخله من تقريبا 2008 . و افضل قسم عندي قسم الروايات والقصص بعشق هالنوعية .

الانتقاد الوحيد إلي وهو اللي خلاني اكتب بهالقسم تحديدا الكلمة اللي بدا بيها اسمه : " فـــضــائــح " ، هالكلمة اللي بتشد المشاهدين العرب.

للأسف نحنا كـ عرب بنتسلى بفضائح الناس وسقطاتهم وزلاَّهم و وبننسى او نتناسى ان ديننا الاسلامي الحنيف بيمنعنا من الخوض في اعراض الناس و اغتيابهم وننسى ان كما تدين تدان .

بقصد ان المشاركين بهالبرنامج بالنهاية بشر متلنا واغلبهم مسلمين وما عندنا اي علاقة بعلاقتهم مع الله اللي اخطأ منهم الله بيحاسبه ، الانسان مش معصوم وممكن اي حدا من هالناس اللي اتفضحوا وانحطوا صورهم وفيديوهاتهم الله يهديه برمشة عين ويكونوا احسن من اللي فضحهم عند الله سبحانه وتعالى.

ليش لما كل شي واضح بالـــقرآن والـحديث النبوي الشريف بنعمل حالنا قضاة و نقول هادا فاسق و هادا شريف !! مين احنا اصلا لنعمل هيك !! احنا مش ملائكة ولا أنبياء ولا رسُل وفيه شي بعد كل هاد اسمه الإنسانية !! هالطلاب والفنانين كمان عندهم اهل ممكن كتير ينأذوا لما يشوفوا الحكي اللي بينقال عن اولادهم ، ليش ما بنحط حالنا مكان الناس و نخلينا بحالنا بدل ما نفضح الناس !!

انا بعرف ممكن يكون الرد ان في الحديث النبوي الشريف رسول الله صلى الله عليه وسلم بيقول: <<من رأى منكم منكرا فليغيره بيده ، فإن لم يستطع فبلسانه ، فإن لم يستطع فبقلبه وذلك أضعف الإيمان>>رواه مسلم ، صدق رسول الله

انا ما بعرف طبعا نـية منشئ هالقسم بس حسب اللي قريته انه تغيير المنكر صح؟ ما شفت اي تغيير للمنكر اللي شفتوا محاولة تغيير المنكر بمنكر أخطر اللي هو الخوض في اعراض الناس ، هالناس اللي ممكن يكونوا احسن عند الله من اللي بيفكر حاله بيغير المنكر .

هاد مش تغيير ابدا هاد اسمه حدا حل مشكلة بوحدة اخطر منها وكمان ما شفت اي نتائج اجابية لهالتغيير شفت روابط تشجيع ومحبين كتار مستعدين يشتموا بأفظع الصفات ناس تانيين هاد منكر.

وكمان لاحظت تناقض لما بواحد من مواضيع القسم المثبتة الممنوعات اللي بالمنتدى منها مثلا عدم تشبيه الطلاب بالحيوانات او القاب غير لائقة القانون اللي بأيدو لأنها خلقة الله سبحانه وتعالى ... حتقولولي وين التناقض؟

.. رح قلكن التناقض ان اللي حاط هالقانون اكيد عارف ان لما الله وسبحانه وتعالى حرم تشبيه الناس بالحيوانات والتنابز بالألقاب حرم الغيبة والخوض في أعراض الناس وقذفهم يعني مش المفروض نعمل بشي من الدين و نخلي شي .

و بس انا من زمان بدي اكتب موضوع هيك بس كنت بنتظر اني اقرا القوانين بالمنتدى ولقيت بيها كتير تناقضات اهمها بالنسبة الي الشي اللي حكيتو. وكمان بعرف ان مش جميع الناس بتاخد بأعراض غيرها وبتفضحهم شفت كتير ناس محترمين هون بعمرهم ما حطوا شي غير لائق عن حدا ولا سبوا وشتموا .

لهيك قلت لكم بالبداية اني بتوقع ان عضويتي حتنوقف وممكن لا بس غالبا حتنوقف صح

، بس المهم عندي اني نبهت ووصلت فكرتي اللي مش مفروضة عحدا بس ريَّحت ضميري ، اللي كنت بدي وصله ان الناس سواسية كلها وما في حدا حكَم على حدا كلنا عبيد الله وهو الوحيد سبحانه وتعالى اللي ممكن يهدينا و يضلنا .

و شكرا

المصدر: منتديات تحميل سيتي - من قسم: فضائح ستار اكاديمي 11 Star Academy