تعرفي على أسباب زيادة الوزن لدي الاطفال!

من طرف **Admin** الجمعة نوفمبر 18, 2016 7:33 pm

مش عارفة أخس بسبب مامتي، و معظم الوقت بقعد أشرب و أكل عشان أغيظها. بتحكيلنا "آية" طالبة وزنها 110 كيلو، عن قصتها مع زيادة الوزن و مضايقتها من مامتها.

المشكلة مع آية بدأت من الطفولة، وهي عندها 9 سنين، مكنتش بتعرف تسيطر علي نفسها و لا شايفة إن في مشكلة في حجم جسمها في السن دا.بس مامتها كانت شايفه المشكلة، فكانت دايما بتضايقها بالكلام و تطلب منها إنها تبطل أكل قدام الناس، و تطلب من الناس إن محدش يديها أكل، و كان دا بيحرجها أكيد، مكنتش بتقعد تتكلم معاها بهدوء و تفهمها ايه أضرار زيادة وزنها دي و لا حاولت تحط معاها نظام و تشجعها عليه من غير ماتضايقها، لدرجة إنها كانت بتحس إنها بتكره مامتها لفترة طويلة.

و قالتلنا آية، إنها مبدأتش تاخد بالها و تركز إن حجمها أكبر من كل اللي حوليها غير بعد ما كملت 13 سنة و و بدأت تحس إن نفسها تخس و شكلها يبقي حلو، بس تفكيرها في إن مامتها كدة هتفتكر إنها بتخس عشان الأوامر اللي بتديهلها أو التعليقات اللي بتسمعها من اللي حوليها كانت بتخليها تعند و متخدش خطوة، و لو أي حد كان بيقول لأية إن مامتها بتعمل كدة عشان مصلحتها، مكنتش بتصدق و و بتقول إن دا مبيوصلهاش من طريقة مامتها و أسلوبها و إنها دايما علي إعتقاد إن لما الأم بتضرب أو بتزعق لأولادها دا بيكون عشان هي متعصبة مش عشان مصلحتهم.

و عشان قصة أية دي، لازم كل أم تتعلم إنها متكونش ديكتاتورية مع ولادها و إن محدش بيحب الأوامر و القوة، و إن أحسن طريقة للتعامل مع الأولاد و خاصة البنات لأنهم أكثر حساسية، إنك تواجهيهم بالحقيقة بس برفق و تديهم المساحة إنهم يخدوا قرارتهم بنفسهم، التغيير عمره ما حيجي غير من جواهم.

و أكدتلنا الدكتورة مرلين بسطاوروس دكتورة في علم النفس، إن البيت اللي فيه أكتر من شخص بيعاني من الزيادة في الوزن، لازم يغيروا من اللايف ستايل بتاعهم، يساعدوا بعض بأكل صحي ليهم كلهم و يشجعوا بعض بممارسة الرياضة حتي لو إنهم ينزلوا يتمشوا مع بعض، فيحسوا إنهم مرتبطين ببعض و إنهم مش لوحدهم و لا منبوذين، ليهم أكل معين ونظام خاص بيومهم لواحدهم، المشاركة بتشجع

و أكدت حنان صبري خبيرة في التربية إن لو عندك بنت أو ولد زايدين فى الوزن، لازم تعلميهم يحبوا نفسهم لشخصهم مش لشكلهم، و إن قيمتهم مش بتتمثل في شكلهم، و المحافظة علي الوزن دي حاجة ترجع لصحتك.

المصدر: منتديات تحميل سيتي - من قسم: عالم الطفولة العاب وقصص وروايات اطفال